Kaliforniyadagi Stanford universiteti talabalari oddiy materialdan ikki funksiyali yordamchi robotni ixtiro qildilar. Bu haqda «Gadget» nashri xabar berdi.

Nashrning yozishicha, ushbu robot «Mobile Aloha» deb nomlangan va u 50 xil vazifani bajara oladi. Jumladan, u liftning chaqirish tugmasini bosish, qisqichbaqa qovurish, oshxona anjomlarini joylashtirish, shkaf eshigini ochish, qo’ng’iroq qilish va qo’ng’iroqqa javob berish kabi vazifalarni mustaqil bajara oladi.

Ishlab chiqaruvchilar barcha loyiha materiallari, jumladan shunga o’xshash robotni yasash bo’yicha ko’rsatmalar, ma’lumotlar to’plami va robotni vazifa bajarishga o’rgatish kodlarini ommaga taqdim etdilar. Bu orqali qiziquvchilar ham xuddi shunday robot yasashlari mumkin bo’ladi.

Hozirda ushbu yordamchi robot 32 ming dollar baholanmoqda.

Eslatib o’tamiz, avvalroq Britaniyaning Envision Racing formula poygalari kompaniyasi rassom Liam Hopkins bilan birgalikda tashlab yuborilgan gadjetlardan Formula E poyga mashinasining to’liq o’lchamli, boshqariladigan nusxasini yasagandi.