An’anaga ko‘ra, nafosat va go‘zallik ayyomi – Xalqaro xotin-qizlar kuni munosabati bilan mehnat faoliyati va jamoat ishlarida namuna ko‘rsatgan bir guruh opa-singillarimiz Prezidentimizning tegishli Farmoniga muvofiq davlat mukofotlari bilan taqdirlandi.

Ular orasida O‘zbekiston Xalq demokratik partiyasining a’zolari ham bor.

So‘z – mukofotlanganlarga!

Gulzar MAMBETNIYAZOVA,

Chimboy tuman hokimi o‘rinbosari – oila va xotin-qizlar bo‘limi boshlig‘i,
“Do‘stlik” ordeni sohibasi:

– Ozmi-ko‘pmi mehnatim yuksak qadrlanib, “Do‘stlik” ordeniga munosib ko‘rilganimdan nihoyatda baxtiyorman. Bu mukofot menga yanada kuch beradi, yangi o‘zgarishlarga daxldorlik tuyg‘usini karrasiga oshiradi. Bor bilimimni, bor kuchimni yurt taraqqiyoti uchun bag‘ishlashga harakat qilaman.

Bugun mamlakatimizda biz, ayollarga barcha sohada o‘z salohiyatimizni namoyon etishimiz uchun keng imkoniyatlar yaratilmoqda. Xotin-qizlar har tomonlama qo‘llab-quvvatlanyapti. Bu esa amalda o‘zining ijobiy natijalarini bermoqda. Oilada oqila va fidoyi ayollarimiz hamma sohada faol, yetakchiga aylanayotir. Masalan, o‘tgan yilgi parlament saylovlarida Chimboy tumanidan saylangan deputatlarning 40 foizini ayollar tashkil etdi. Oldin bunday ko‘rsatkich kuzatilmagan. Yoki yurtimiz oliy o‘quv yurtlarida tahsil olish uchun qoraqalpog‘istonlik yoshlarga 10 mingta qo‘shimcha kvota ajratilib, uning 67 foizi xotin-qizlarimiz hissasiga to‘g‘ri kelgani g‘oyatda quvonarli.

Davlatimiz rahbari Ko‘ksaroy qarorgohida Xalqaro xotin-qizlar kuni munosabati bilan o‘tkazilgan bayram tadbirida uy-ro‘zg‘or ishlari va farzand tarbiyasidan ortib, ta’lim olayotgan, mehnat qilayotgan va tadbirkorlik bilan shug‘ullanayotgan xotin-qizlar zamonamizning haqiqiy qahramonlari ekanini alohida ta’kidladi. Yangi O‘zbekistonda xotin-qizlarning og‘irini yengil qilish, ular uchun barcha sohalarda zarur sharoitlarni yaratib berish doimo davlat siyosatining eng ustuvor yo‘nalishlaridan biri bo‘lib qolishi qayd etildi. Bu davlat va jamiyat hayotida tashabbuskor, shijoatli ayollarimiz safi tobora kengayib borishiga zamin hozirlaydi. Har bir ayol oilaning, jamiyatning tayanchi, umidi, baxtidir.

Gavharoy TOJIXONOVA,

Marhamat tumani «Yangi hayot» mahalla fuqarolar yig‘ini hokim yordamchisi,
“Shuhrat” medali sohibasi:

– To‘g‘risini aytsam, bunday e’tiborni kutmagan edim. Ko‘ksaroy qarorgohida o‘tgan bayram tadbirida ishtirok etib, Prezidentimizning qo‘llaridan mukofot olayotgan chog‘imda ko‘nglimda o‘tgan hayajon va quvonchni so‘z bilan ta’riflay olmayman. Nihoyatda mamnun bo‘ldim. Undan ham ko‘proq mas’uliyatni his qildim. Bu ishonchni oqlash va hamisha munosib bo‘lish uchun o‘z oldimga yangi maqsadlarni qo‘ydim.

Bugungi kunda mamlakatimizda ayollarning jamiyatdagi o‘rni kengayib bormoqda. Oila mustahkamligi, farzand tarbiyasi kabi masalalarga jiddiy e’tibor qaratilmoqda.

Ijtimoiy-huquqiy himoyaga muhtoj, og‘ir ijtimoiy ahvolda qolgan, jumladan, oilaviy muammolarga, turmushida zo‘ravonlikka duch kelgan ayollarni aniqlash, ular bilan yakka tartibda profilaktik tadbirlar o‘tkazish va shu orqali sog‘lom turmush tarziga qaytarish eng dolzarb masalaga aylandi. Buni chuqur anglagan holda ish faoliyatim davomida hududimizdagi har bir ayol hayotidan, orzu-maqsadlari, tashvish-muammolaridan boxabar bo‘lishga, turli og‘ir vaziyatlarga tushib qolgan opa-singillarimizga yordam qo‘lini cho‘zishga vaqtimni ham, kuchimni ham ayamayman.

Oygul SHOMURATOVA,

Termiz tuman obodonlashtirish boshqarmasi gul yetishtiruvchisi,
“Do‘stlik” ordeni sohibasi:

– Orden bilan mukofotlanganimni eshitganimda xursandligimdan ichimga sig‘may ketdim. Necha kun o‘tdiki, hali ham hayajonim bosilgani yo‘q. Bunday yuksak darajada mehnatim e’tirof etiladi, deb hech o‘ylamaganman. Bu Termiz tumani obodonlashtirish boshqarmasida issiqni issiq, sovuqni sovuq demay mehnat qilayotgan barcha ayollarning ham yutug‘i, hammamizga berilgan rag‘batdir. Shu bilan birga yurtimizda har bir xotin-qizning o‘z o‘rni, qadri borligini yana bir karra tasdiqlaydi.

Chindan ham so‘nggi yillarda biz, ayollarning oilada va jamiyatda o‘rnimizni, mavqeimizni yanada oshirish yo‘lida qilinayotgan ishlarni hayotimizdagi yaxshi o‘zgarishlar, yaratilayotgan yengillik va qulayliklar misolida ko‘rib-bilib turibmiz. Bunday g‘amxo‘rlik, sharoit va imtiyozlar yangi maqsadlarga, yangi marralarga ruhlantirmoqda.

Yangiliklar yaxshiliklarga ulanaversin, har bir ayol baxtli, saodatli yashasin, deyman. Bunga uning to‘la haqqi bor.

“O‘zbekiston ovozi” muxbiri

Xurshidabonu NAZAROVA yozib oldi.