Toshkent shahri Chilonzor tumanida Lacetti boshqaruvidagi haydovchi ikki piyodani urib yubordi. Bu haqida poytaxt YHXB axborot xizmati xabar berdi.

Holat 22-oktyabr kuni soat 06:20 larda Bunyodkor shohko‘chasida sodir bo‘lgan. Mashina piyodalarni urib yuborib, daraxt bilan to‘qnashgan.

Yo‘l transport hodisasi oqibatida haydovchi va piyodalardan biri olgan tan jarohatlari oqibatida voqea joyida vafot etgan. Yana bir piyoda, 64 yoshli K.S. shifoxonaga olib ketilgan.

Holat yuzasidan Toshkent shahar IIBB Tergov boshqarmasi tomonidan Jinoyat kodeksining 266-moddasi (Transport vositalari harakati yoki ulardan foydalanish xavfsizligi qoidalarini buzish) 3-qismi bilan jinoyat ishi qo‘zg‘atilgan. Tergov davom etmoqda.