Qish yaqin. Gaz «zapravka»larida esa har doimgi turnaqator navbatlar boshlanish arafasida. O‘zbekiston energetika vaziri Jo‘rabek Mirzamahmudov qish mavsumida avtomobil egalarining hayotini ancha yengillashtirishi kutilayotgan loyihani taqdim etdi. Gap avtomobillarga yoqilg‘i quyish shoxobchalari ishini va ularda gaz mavjudligini real vaqt rejimida kuzatish imkonini beruvchi mobil ilova haqida bormoqda.

Vazirning so‘zlariga ko‘ra, tizim butun mamlakat bo‘ylab 1200 dan ortiq yoqilg‘i quyish shoxobchasini qamrab oladi. Foydalanuvchilar nafaqat gaz mavjudligini, balki u yoki bu yoqilg‘i quyish shoxobchasiga gaz qachon kelishini kutish mumkinligi haqida ham ma’lumot olishlari mumkin bo‘ladi.

Loyihaning asosiy jihatlaridan biri uning barcha ishtirokchilar uchun bepulligidir. Yoqilg‘i quyish shoxobchalari o‘z ob’yektlarining ishlashi to‘g‘risidagi ma’lumotlarni taqdim etib, ixtiyoriy ravishda tizimga ulanishlari mumkin.

Bundan tashqari, ilova har bir stansiyaning ish vaqti va band bo‘lishi darajasi haqidagi ma’lumotlarni ko‘rsatish funksiyasi bilan ta’minlanadi. Ushbu ilova orqali foydalanuvchilar tezkor va aniq ma’lumotlarni olishlari mumkin bo‘ladi, bu esa stansiyalardagi yuklamani sezilarli darajada kamaytiradi va avtomobil egalarining shikoyatlari sonini kamaytiradi.

 

«Bu ilova odamlarga ortiqcha tashvish va navbatlarsiz o‘z avtomobillariga yonilg‘i quyish mumkinligiga ishonch beradi. Biz gaz stansiyalari ishini, ayniqsa yuklama yuqori bo‘lgan davrlarda, yanada shaffof va barcha fuqarolar uchun qulay qilishga intilyapmiz,» – degan vazir.