Muallif: root_super

O’zbekistonning Qirg’izistondagi yangi elchisi tayinlandi

Posted on | by root_super | Leave a Comment on O’zbekistonning Qirg’izistondagi yangi elchisi tayinlandi

 

O’zbekistonning yangi tayinlangan Favqulodda va Muxtor Elchisi Saidikrom Niyozxo’jayev Qirg’iziston poytaxtiga keldi. Bu haqda «Dunyo» AA xabar berdi. Saidikrom Niyozxo’jayev Bishkekka tayinlanishidan oldin, 2018-yildan buyon O’zbekistonning Qozog’istondagi Favqulodda va Muxtor elchisi lavozimida ishlab kelayotgan edi. Tajribali diplomat 2024-yil avgust oyida amalga oshirilgan ulkan ishlar va ikki tomonlama munosabatlarni mustahkamlashga qo’shgan katta hissasi uchun Qozog’iston Prezidentining farmoni bilan II darajali «Dostiq» ordeni bilan taqdirlangan.

 

Elchi Saidikrom Niyozxo’jayev 59 yoshda. Toshkent politexnika institutini (hozirgi Toshkent davlat texnika universiteti) tamomlagan. 2015-yilda O’zbekiston tashqi ishlar vaziri o’rinbosari etib tayinlanguniga qadar Prezident Administratsiyasi va hukumat tuzilmalarida mas’ul lavozimlarda, jumladan, davlat maslahatchisi o’rinbosari, iqtisodiyot vaziri o’rinbosari bo’lib ishlagan.

 

Saidikrom Niyozxo’jayev 2020-2024-yillarda mamlakatimizning Bishkekdagi diplomatik missiyasiga rahbarlik qilgan Xurshid Mirzohidov o’rniga tayinlandi.

Isroilning Livanga bergan zarbalari oqibatida halok bo‘lganlar soni 550 nafardan oshdi

Posted on | by root_super | Leave a Comment on Isroilning Livanga bergan zarbalari oqibatida halok bo‘lganlar soni 550 nafardan oshdi

 

CNN telekanali Livandagi manbalarga tayanib xabar berishicha, so‘nggi kunlarda Isroil hujumlari qurbonlari soni 550 kishidan oshgan. Halok bo’lganlar orasida 50 nafar bola, 94 nafar ayol bor. 1800 dan ortiq kishi jarohatlangan. Isroil mahalliy aholining uylariga ham hujum qilmoqda.

 

Livan TIV xabariga ko‘ra, mamlakat janubiy viloyatlaridan kelgan qochqinlar soni yarim million kishiga yaqinlashmoqda. Isroil va Hizbulloh o‘rtasidagi qarama-qarshilik 17 va 18-sentabr kunlari Livanda bir qator aloqa qurilmalari portlashi sodir bo‘lganidan keyin avj oldi.

 

Shundan so’ng Livan shimoliy yo’nalishda harbiy amaliyotlar kuchayganini e’lon qildi. Keyinroq esa Isroil havo kuchlari Livan janubidagi chegara hududlariga ommaviy hujumlar uyushtira boshladi.

Prezident Samarqand shahriga tashrif buyurdi

Posted on | by root_super | Leave a Comment on Prezident Samarqand shahriga tashrif buyurdi

 

Prezident Shavkat Mirziyoyev Osiyo infratuzilmaviy investisiyalar banki (OIIB) Boshqaruvchilar kengashining yillik yig‘ilishida ishtirok etish uchun 25-sentabr kuni Samarqand shahriga tashrif buyurdi.

 

Davlatimiz rahbari yig‘ilishning yalpi sessiyasida nutq so‘zlaydi hamda tadbir doirasida bir qator uchrashuvlar o‘tkazadi. Samarqand shahrida o‘tkaziladigan ikki kunlik sammitda 100 dan ortiq mamlakatdan yuqori darajali delegatsiyalar, Osiyo infratuzilmaviy investisiyalar banki, Jahon banki, Osiyo taraqqiyot banki va boshqa xalqaro tashkilotlar rahbarlari hamda vakillari, yetakchi xorijiy kompaniyalarning boshqaruvchilari va nufuzli ekspertlar, jami 2 mingga yaqin ishtirokchi qatnashishi kutilmoqda.

O‘zbekiston Turkmaniston va Turkiya bilan mudofaa sohasida hamkorlik qiladi

Posted on | by root_super | Leave a Comment on O‘zbekiston Turkmaniston va Turkiya bilan mudofaa sohasida hamkorlik qiladi

 

O‘zbekiston Turkmaniston va Turkiya bilan mudofaa sohasida hamkorlik qiladi. Bu haqda Adliya vazirligi axborot xizmati xabar berdi. Unga ko‘ra, prezident tomonidan imzolangan qonunga bilan O‘zbekiston va Turkmaniston Mudofaa vazirliklari o‘rtasida mudofaa sohasida hamkorlik to‘g‘risidagi bitim (Ashxobod, 2023-yil 4-oktabr va Toshkent, 2023-yil 30-oktabr) ratifikatsiya qilindi.

 

Shuningdek, prezident tomonidan imzolangan qonunga ko‘ra, O‘zbekiston va Turkiya hukumatlari o‘rtasida mudofaa sanoati sohasida hamkorlik to‘g‘risidagi bitim (Toshkent, 2021-yil 2-mart va Anqara, 2021-yil 23-mart) ratifikatsiya qilindi.

 

Shavkat Mirziyoyev 27-avgust kuni Turkman xalqining milliy yetakchisi, Turkmaniston Xalq Maslahati raisi Gurbanguli Berdimuhamedov bilan telefon orqali muloqot qilgan edi. O‘zbekiston-Turkmaniston do‘stlik, yaxshi qo‘shnichilik va strategik sheriklik munosabatlarini yanada mustahkamlash, mamlakatlar o‘rtasidagi ko‘p qirrali hamkorlikni kengaytirishning dolzarb masalalari ko‘rib chiqilgandi.

Poyezd ustida selfi tushmoqchi bo‘lgan sinfdoshlarni tok urdi

Posted on | by root_super | Leave a Comment on Poyezd ustida selfi tushmoqchi bo‘lgan sinfdoshlarni tok urdi

 

Shu yilning 17-sentabr kuni Farg‘ona viloyati Uchko‘prik tumanida poyezd vagonlari ustida selfi tushmoqchi bo‘lgan ikki sinfdoshni tok urdi.

 

Qayd etilishicha, Farg‘ona viloyati Transportda xavfsizlikni ta’minlash boshqarmasiga shu yilning 17-sentabr kuni 13:00 larda hodisa haqida xabar kelib tushgan. Xabarga asosan tergov tezkor guruhi tomonidan Buvayda tumaniga qarashli 1-sonli maktabning 2 nafar 10-sinf va 1 nafar 8-sinf o‘quvchilari Uchko‘prik tumanidagi temir yo‘l bekatiga kelgani, va temir yo‘lni belgilanmagan joyidan kesib o‘tib, taqiqlangan hududga kirgani aniqlangan.

 

Ma’lumotlarga ko‘ra, ular bekatda turgan bug‘doy tashuvchi poyezd vagonining ustiga chiqib, selfi tushmoqchi bo‘lgan vaqtida ikki nafar o‘smirni yuqori kuchlanishli elektr toki urgan.

 

Hodisa oqibatida ikki sinfdosh turli darajada tan jarohatlari olib, bolalar tez tibbiy yordam mashinasida shifoxonaga yuborilgan. Birinchi bemor bolalar jonlantirish bo‘limiga o‘tkazilgan. Uning tanasi 63 foiz kuygan. Ikkinchi bemorga tananing termik kuyish va o‘ng son suyagi sinishi tashxisi bilan tibbiy yordam ko‘rsatilgan.

Futbol maydonida odamlar ustiga mashina haydagan erkak 4 yilu 6 oyga qamaldi

Posted on | by root_super | Leave a Comment on Futbol maydonida odamlar ustiga mashina haydagan erkak 4 yilu 6 oyga qamaldi

 

Sirdaryoda futbol maydonida odamlar ustiga Captiva haydagan haydovchiga jinoyat ishi qo‘zg‘atilgan edi. Holat yuzasidan sud yakunlandi.

 

Voqea 29-may kuni soat 18:00 larda viloyatning Sayxunobod tumanida sodir bo‘lgan. Captiva haydovchisi tomonidan sodir etilgan holat Sirdaryo viloyati IIB masʼul xodimlari tomonidan o‘rganilib, mazkur avtomashina haydovchisiga nisbatan Jinoyat kodeksining 277- moddasi (bezorilik) bilan jinoyat ishi qo‘zg‘atilib, tegishli tartibda qamoqqa olingan. Avtomashina jarima maydonchasiga joylashtirilgan. Qayd etilishicha, ushbu shaxs muqaddam ham sudlangan.

 

“Ikkinchi aylangan vaqtimda mashinamning burchagi bir bolaga tegib ketdi. Keyin shuncha voqea bo‘ldi, tavakkal dedim-da, stadion darvozasiga qarab haydadim. O‘sha orada mashinani toshbo‘ron qilishdi. Hammadan uzr so‘rayman. Tavba qildim. Oxirgi imkoniyat berishingizni so‘rayman”, dedi haydovchi.

 

Sudda daʼvogarlar undan shikoyati yo‘qligini bildirgan. Lekin mashinasi old qismi bilan ikki nafar shaxsni turtib yuborib, voqea joyidan qochib ketgani sababli uni oqlab bo‘lmasligi taʼkidlangan. Unga nisbatan 4 yilu 6 oy ozodlikdan mahrum qilish jazosi tayinlandi.

Toshkentdagi maktabda o‘qituvchi o‘quvchini dars vaqtida kaltakladi

Posted on | by root_super | Leave a Comment on Toshkentdagi maktabda o‘qituvchi o‘quvchini dars vaqtida kaltakladi

 

Ijtimoiy tarmoq sahifalarida Chilonzor tumanidagi 188-maktabda o‘qituvchi o‘quvchini kaltaklaganligi haqida xabar chop etildi.

 

Mazkur holat yuzasidan Toshkent shahar maktabgacha va maktab ta’limi boshqarmasi quyidagilarni ma’lum qiladi. Chilonzor tumanidagi 188-sonli umumta’lim maktabida 2024 yil 23-sentabr kuni taxminan soat 15 lar atrofida ikkinchi smenada 6-«V» sinfida rus tili fani darsi mahalida o‘qituvchi R.O. ga o‘quvchi E.G. gap qaytargan va tortishib qolgan. So‘ngra o‘qituvchi R.O. o‘quvchi E.G. ni qulog‘idan cho‘zgan, o‘tirgan joyidan partasidan tortib olib chiqqan va o‘quvchining yuziga tarsaki tushirgan. O‘quvchiga tan jarohati yetkazilmagan, salomatligi joyida.

 

Bundan xabar topgan o‘quvchi E.G. ning ota-onasi o‘qituvchining bu xatti-harakati yuzasidan huquq-tartibot idoralariga murojaat qilishgan. Ayni paytda surishtiruv ishlari olib borilmoqda.

 

Ma’lumot o‘rnida shuni ma’lum qilamizki, rus tili fani o‘qituvchisi R.O. sinov muddati bilan maktabga ishga taklif qilingan, rasman u 188-maktabga ishga qabul qilinganligi bo‘yicha hali buyrug‘i chiqmagan va yuqoridagi voqea uning dastlabki ish kunida sodir bo‘lgan.

Qozog’istondan Nukusga kelayotgan poyezdda yong‘in chiqdi

Posted on | by root_super | Leave a Comment on Qozog’istondan Nukusga kelayotgan poyezdda yong‘in chiqdi

 

Qozog‘istonning Mang‘istov shahri va Nukus oralig‘ida qatnovchi poyezd harakatlanib ketayotganda yong‘in sodir bo‘lgan. Ma’lum qilinishicha, 2024-yil 19-sentabr kuni soat 14:47 da Mang‘istau – Nukus yo‘lovchi poyezdi teplovozining “B” seksiyasining turbokompressoridan uchqun chiqa boshlagan va bu vagonlararo tutashuvlarda maxsus rezina plastinalarning yonishiga olib kelgan.

 

Mashinist tomonidan teplovoz harakat tarkibidan soat 14:50 da uzilib yong‘in bartaraf qilingan va u soat 15:30 da harakatni davom ettirgan. Yuqorida keltirib o‘tilgan holat bo‘yicha fuqarolarga va yo‘lovchi vagonlariga shikast yetmagan.

 

Yong‘in bartaraf qilinib poyezd soat 15:30 da harakatni davom ettirgan. Yo‘lovchi poyezd Nukus stansiyasiga soat 16:23 da 1 soat 3 daqiqa jadvaldan kech kirib kelgan.

 

Qayd etilishicha, mas’ul shaxslarga nisbatan intizomiy choralar ko‘rilgan va qolgan lokomotivlar yong‘in xavfsizligi bo‘yicha takroriy tekshiruvlardan o‘tkazilgan.

Eskrou – uy-joy siyosatida oqilona yechim

Posted on | by root_super | Leave a Comment on Eskrou – uy-joy siyosatida oqilona yechim

 

Xabaringiz bor, kuni kecha Prezident Shavkat Mirziyoyev raisligida qurilish industriyasi va qurilish materiallari tarmog‘ini rivojlantirish chora-tadbirlari muhokamasi bo‘yicha videoselektor yig‘ilishi o‘tkazildi. Unda iqtisodiyotimizning eng muhim tarmoqlaridan biriga aylangan mazkur sohada erishilayotgan yutuqlar bilan bir qatorda mavjud muammolar, xususan, aholi manfaatlariga zid o‘laroq davom etayotgan holatlar tanqid qilindi. Joylardagi qurilishlar sifati masalasiga alohida e’tibor qaratildi. Ayrim pala-partish loyihalar odamlarning e’tiroziga sabab bo‘layotgani qayd etildi.

 

Aytib o‘tilganidek, bugungi uy-joylar qurilishida aldov, tushunmovchiliklar uchrab turibdi. Shu bois endi uy-joy sotib olish bo‘yicha kafolatli “eskrou” tizimi joriy qilinishi belgilandi.

 

Dunyo tajribasidan o‘tgan eskrou tizimi – bu ma’lum shartlar bajarilgunga qadar pul saqlanadigan bankdagi maxsus hisobvaraq bo‘lib, qurilayotgan uyga buyurtma beruvchi o‘z pulini eskrou hisobraqamiga qo‘yadi va sotuvchi (qurilish korxonasi) faqat shartnomadagi majburiyatlarini bajarganidan so‘ng uni olishi mumkin. Ko‘rinib turibdiki, uy-joy qurishni eskrou hisobraqami asosida moliyalashtirish aholi manfaatini kafolatlaydi.

 

“Bunda banklar quruvchi va xaridor o‘rtasida ko‘prik bo‘lib, uy-joyning o‘z vaqtida va sifatli qurilib, egasiga topshirilishiga kafil bo‘ladi”, dedi davlat rahbari.

 

Eslatib o‘tamiz, O‘zbekiston Xalq demokratik partiyasi turar-joylarni qurishda jalb qilingan aholi mablag‘larini himoya qilish kafolatlarini yaratish masalasini o‘z Saylovoldi dasturiga kiritgan. Ushbu maqsadda “Ulush kiritish asosida uy-joy qurishda ishtirok etish to‘g‘risida”gi Qonunni qabul qilish tashabbusini ilgari surmoqda. Bunda uy xaridorlari pulini maxsus eskrou hisobraqamga joylashtirish va qurilish korxonasining shartnomadagi majburiyatlarini bajarishiga qarab, bosqima-bosqich mablag‘larni olishi tartibini joriy etish qonuniy asosda mustahkamlanadi.

Netanyaxu Livan xalqiga murojaat qildi

Posted on | by root_super | Leave a Comment on Netanyaxu Livan xalqiga murojaat qildi

 

Isroil bosh vaziri Binyamin Netanyaxu Livan aholisiga noodatiy videomurojaat yo‘llab, ularni Hizbulloh harakati qurol saqlaydigan hududlarni tark etishga chaqirdi.

 

“Livan xalqi! Isroil siz bilan emas, Hizbulloh bilan urush qilmoqda. Juda uzoq vaqt u sizdan tirik qalqon sifatida foydalandi. Yashash joylaringizga raketalarini joylashtirdi. Bu raketalar va snaryadlar to‘g‘ridan to‘g‘ri shaharlarimizga va fuqarolarimizga qaratilgan, xalqimizni Hizbulloh hujumlaridan himoya qilish uchun biz bu qurollarni yo‘q qilishimiz kerak”, – dedi bosh vazir.

 

Bosh vazir, shuningdek, Isroil armiyasining livanliklarni “Hizbulloh” qurollari joylashtirilgan hududlarni tark etishga chaqirgan ertalabki chaqirig‘ini eslagan.

 

“Bu ogohlantirishni jiddiy qabul qilishingizni so‘rayman. Hizbulloh sizning va yaqinlaringizning hayotini xavf ostida qoldirishiga yo‘l qo‘ymang”, – deya qo‘shimcha qilgan Netanyaxu.