Bugun Prezident Shavkat Mirziyoyev Olmaliq kon-metallurgiya kombinatiga tashrif buyurib, sanoat tarmoqlari uchun muhandislarni tayyorlash maktabi hamda «Yoshlik-1» konini o‘zlashtirish ishlari bilan tanishadi, mis boyitish bo‘yicha yangi quvvatlar qurilishiga start beradi.
Shuningdek, Prezident raisligida Toshkent viloyatini ijtimoiy-iqtisodiy rivojlantirish vazifalari yuzasidan yig‘ilish o‘tkazilishi rejalashtirilgan.
Kunlar sovishi munosabati bilan Favqulodda vaziyatlar vazirligi isitish pechlaridan foydalanishda texnika va yong‘in xavfsizligi qoidalariga rioya qilishga chaqirdi.
Quyidagi tavsiyalarga amal qiling:
— isitish pechlari va ularning dudburonlari sozligiga, turli buyum va to‘siqlar bilan berkitilmasligi hamda yoriqlar bo‘lmasligiga alohida e’tibor bering;
— gaz uskunalarini ulash tartib qoidalariga rioya qiling va ularga rezina shlanglar orqali ulanishga yo‘l qo‘ymang;
— maxsus tashkilotlar tomonidan dudburonlarning o‘z vaqtida tozalanishiga e’tibor qarating.
«Tolibon» O‘zbekiston rasmiylaridan Termizdagi umumiy chegara bozorida konsert va musiqiy dasturlarni bekor qilishni so‘radi. Agar bu talab bajarilmasa, Afg‘oniston fuqarolariga ushbu bozorga kirishga taqiqlanishi mumkin.
Termizdagi chegara bozoriga tashrif buyuruvchilar uchun musiqiy dasturlari va konsertlar tashkil etilgan. Kechalari o‘zbek san’atkorlari tomonidan konsertlar o‘tkaziladi.
O‘zbekiston hukumati vaziyat yuzasidan qabul qiladigan qarori ikki tomonlama munosabatlarga yoki ijobiy, yo salbiy ta’sir qilishi mumkin. Avgust oyida Termiz xalqaro savdo markazi ochilgan bo‘lib, «Tolibon» va O‘zbekiston o‘rtasidagi kelishuvga ko‘ra, afg‘onistonliklar ushbu bozorda vizasiz 15 kun davomida qolish imkoniyatiga ega.
15-oktabr kuni Jahon chempionati saralash turniri doirasida O‘zbekiston va BAA terma jamoalari o‘rtasida muhim o‘yin bo‘lib o‘tadi. O‘zbekiston futbol assosiatsiyasi muxlislarni chiptalarni noqonuniy sotib olish va qalbakilashtirish holatlari haqida ogohlantirdi.
Qayd etilishicha, avvalgi o‘yinlarda ko‘plab muxlislar qalbaki chiptalar sotib olib, stadionga kirishda muammolarga duch kelgan. Bu futbol muxlislari uchun noqulayliklar yaratgan va o‘yindan yoqimsiz taassurotlar qoldirgan.
O‘FA bunday holatlarning takrorlanmasligi uchun choralar ko‘rilishi va qalbaki chiptalarga qarshi kurash olib borilishini ma’lum qildi. Chiptalarni qalbakilashtirishga qo‘l urgan shaxslarga nisbatan qat’iy choralar ko‘riladi.
O‘FA muxlislarga faqat rasmiy manbalarda chipta sotib olishni tavsiya qilib, qalbaki chiptalar bilan stadionga kirish imkoni yo‘qligini yana bir bor eslatib o‘tgan.
Joriy yilning 10-oktabr kuni soat 23:30 atrofida Olmazor tumani Nurafshon ko‘chasida YTH sodir bo‘ldi. Bu haqida Toshkent shahar IIBB YHXB Axborot xizmati xabar qildi.
Aniqlanishicha, ushbu YTH 1984-yilda tug‘ilgan haydovchi B.Q. boshqaruvida bo‘lgan Spark va 2004-yilda tug‘ilgan I.T. boshqaruvida bo‘lgan Matiz rusumli avtomashinalari ishtirokida yuz bergan. Ushbu YTH oqibatida Spark avtomashina haydovchisi olgan tan jarohatlari sabab voqea joyida vafot etgan.
Shuningdek Spark ichida bo‘lgan 2 nafar yo‘lovchi hamda Matiz haydovchisi shifoxonaga olib ketilgan.
«Mazkur holat yuzasidan Toshkent shahar IIBB Tergov boshqarmasi tomonidan JKning 266-moddasi 2-qismi bilan jinoyat ishi qo‘zg‘atilgan. Tergov davom etmoqda»,- deyiladi xabarda.
AQSHning Florida shtatiga katta vayronagarchilik va qurbonlar olib kelishi kutilayotgan “Milton” to‘foni va tornado shtatning g‘arbiy qirg‘oqlariga yetib keldi. Bu haqda ABC News xabar berdi.
Floridaga yetib borishdan oldin “Milton” biroz zaiflashgan va eng xavfli beshinchi toifadan dastlab to‘rtinchi, keyin esa uchinchi (shamol tezligi 208 km/soat)ga ko‘chirilgan. Biroq ekspertlar, “Milton” hali ham vayronkor va halokatli ekanini aytmoqda. Allaqachon 1,9 milliondan ortiq aholi elektr energiyasiz qolgan, 125 ta uy vayron bo‘lgan.
Prezident Jo Bayden ham to‘fon vayronkor bo‘lishidan ogohlantirib, aholini evakuatsiya buyruqlariga quloq solishga chaqirgan.
“U aholi punktlarini butunlay vayron qilishi va odamlar o‘limiga olib kelishi mumkin”, degan AQSH yetakchisi.
Amerikaning to‘fonlarni o‘rganish milliy markazi Grinvichda tungi soat ikkilarda “Milton” quruqlikka chiqqandan so‘ng biroz zaiflashgani va ikkinchi toifaga o‘tkazilganini e’lon qildi. Ikkinchi toifada doimiy shamol tezligi 154 dan 177 km/soatgacha bo‘ladi. Hozirda “Milton” Florida yarimoroli orqali shimoli-sharqqa, Atlantika okeani tomon harakatlanmoqda.
Jurnalistlar AQSh prezidentligiga Demokratik partiyadan nomzod Kamala Xarrisning taqinchoqlari narxini hisoblab chiqdi. O’zini «o’rta sinfdan bo’lgan kamtarin ayol» deb ta’riflagan siyosatchi 200 ming dollardan ortiq zargarlik buyumlari egasidir.
Xarris ancha yillardan beri 18 500 dollarlik oltin marjonlarni taqib yuradi. Bundan tashqari, Xarris kolleksiyasida turli xil marvarid taqinchoqlar mavjud. Klassik marvarid marjonlari uning o’ziga xos aksessuari va karyerasining boshida tashqi ko’rinishining ajralmas qismiga aylangan.
Jurnalistlar Xarris kolleksiyasidagi eng diqqatga sazovor buyumlardan biri 26 440 dollarga baholangan marvarid ekanini ta’kidlashgan.
Aniqlanishicha, marhum 1988-yilda tug‘ilgan bo‘lib, temiryo‘lda konduktor lavozimida ishlab kelgan. O‘rganishlar davomida mazkur holat teplovozga yuk vagonlarini ulayotgan vaqtda sodir bo‘lganligi ma’lum bo‘lgan.
Xodim o‘zining ehtiyotsizligi sabab temiryo‘l izlariga yiqilib tushgan. Oqibatda uni yuk vagonlari bosib ketgan.
Voqea joyiga tegishli mas’ullar va tez tibbiy yordam kelgan kelgan. Ammo ko‘rsatilgan yordamga qaramasdan xodim voqea joyida vafot etgan.
Mirzo Ulug‘bek nomidagi O‘zbekiston Milliy universiteti talabasi Ma’naviy-ma’rifiy ishlar bo‘yicha dekan o‘rinbosariga salom bermagani uchun jazolandi. Holat yuzasidan universitet rasmiy munosabat bildirdi.
Qayd etilishicha, O‘zbekiston Milliy universitetida yoshlar bilan ishlash bo‘yicha dekan o‘rinbosari va boshqa ustozlarga salom bermagani uchun hech qanday mas’ul tomonidan talabadan tushuntirish xati yozdirib olinmagan.
“Talabalarning ustozlarga hurmat bilan munosabatda bo‘lishi, salom berishi yoki bermasligi ularning shaxsiy madaniyatiga taalluqli masala hisoblanadi”, — deyiladi munosabatda.
Biroq talabaning uzr so‘rab, tushuntirish xati yozishga majburlangani yuzasidan izoh berilmagan.
Shuningdek, jurnalist Muhrim A’zamxo’jayev kecha o’zining telegram kanalida salom bermagani uchun tushuntirish xati yozgan talabani, u yozgan xatning surati tarqalib ketgach, dekanning xonasiga olib kirib ketishgani va bir soatdan ko‘p o‘sha yerda o‘tirgani haqida yozgandi. Bundan tashqari jurnalist holat bo’yicha «Ey, talaba do‘stim, kayfiyatni tushirmang! Hammasi yaxshi bo‘ladi. Mas’ullar esa qilayotgan ishlaridan va qilishlari kerak bo‘lgan ishlarni qilmayotganliklaridan uyalsin!» deya izoh qoldirgan.
Bosh murabbiy Vladimir Bayramov boshchiligidagi “Arkadag” futbol klubi ketma-ket ikkinchi yil muddatdan oldin Turkmaniston chempioni unvonini qo‘lga kiritdi.
Jamoa mamlakat chempionati yakunlanishiga besh tur qolganda Balkanobodning “Nebitchi” jamoasini qabul qilib, 5:1 hisobida ishonchli g‘alabaga erishdi. Ushbu g’alaba evaziga «Arkadag» o’zining eng yaqin ta’qibchisi «Ahal»dan 23 ochkoga uzib ketdi.
“Arkadag” klubi milliy ahamiyatga ega yangi shahar sharafiga shunday nomlangan. Jamoa 2023-yilda tashkil etilgan bo’lib, birinchi yilidayoq Turkmaniston chempionati va mamlakat kubogi sohibiga aylangan. Mana shu g‘alabalar evaziga «Arkadag» OFK Challenj ligasida ishtirok etish huquqini qo‘lga kiritdi.