Keyingi yillarda mamlakatimizda kambag‘allikni qisqartirish chora tadbirlari davlat siyosatining ustuvor yo‘nalishlaridan biriga aylandi. Aholi ijtimoiy himoyasini mustahkamlash, kuchli ijtimoiy siyosat yuritishni maqsad qilgan Xalq demokratik partiyasi uchun ham bu prinsipial masala hisoblanadi. Shu sababdan partiya mazkur sohadagi strategik vazifalarning hududlardagi ijrosi bo‘yicha doimiy o‘rganish va tahlillar olib bormoqda.
Navoiy shahrida o‘tgan “Kambag‘allikni qisqartirish: natijalar, muammo va yechimlar” mavzusidagi jamoatchilik eshituvida viloyatdagi mavjud holat mas’ul idoralar mutasaddilari ishtirokida atroflicha muhokama qilindi.
Kun tartibidagi masala yuzasidan Navoiy viloyat kambag‘allikni qisqartirish va bandlik boshqarmasi, shuningdek, Ijtimoiy himoya milliy agentligi viloyat boshqarmasi rahbarlarining axboroti eshitildi.
Qayd etilishicha, 2025 yil boshida viloyatda Ijtimoiy reyestrda turgan kambag‘al oilalar soni 13,8 mingta bo‘lib, kambag‘allik darajasi 5,7 foizni tashkil qilgan. Yil davomida 10,2 ming oila kambag‘allikdan chiqarilib, kambag‘allik darajasi 4,2 foizga tushgan.
O‘tgan yili viloyatda 156,7 ming nafar aholini daromadli mehnat bilan ta’minlash reja qilingan bo‘lsa, amalda bu raqam 162,7 ming nafarni tashkil etgan.
Navoiy, Zarafshon va G‘ozg‘on shaharlarida ishsizlik darajasi 4 foizdan pasayib, “tabiiy ishsizlik” darajasiga yaqinlashgani ham muhim natija sifatida qayd etildi.
Eshituvda deputatlar kambag‘allikni qisqartirishda erishilgan natijalar bilan bir qatorda, hali yechimini kutayotgan masalalarga ham to‘xtalib o‘tdilar. Xususan, bugungi kunda viloyatdagi 310 ta mahalladan 143 tasi kambag‘allikdan chiqarilgani, ayrim hududlarda aholini doimiy va barqaror daromad manbalari bilan ta’minlashda uchrayotgan muammolar tahlil qilindi.
Mutaxassislarning fikricha, kambag‘allikni qisqartirishda ta’lim tizimi bilan mehnat bozori o‘rtasidagi uzviy bog‘liqlikni ta’minlash muhim. Kasb-hunarga o‘qitish markazlarida bozorda talab yuqori bo‘lgan mutaxassisliklar bo‘yicha o‘quv kurslarini tashkil etish va bitiruvchilarni ishga joylashtirishning aniq mexanizmlarini joriy etish orqali samaradorlikni oshirish mumkin.
Shuningdek, kambag‘allikni qisqartirishga faqat ijtimoiy nafaqalar ajratish va bir martalik yordamlar bilan emas, balki aholining doimiy daromadga ega bo‘lishi, yangi ish o‘rinlari yaratish orqali erishish mumkinligi ta’kidlandi.
Jamoatchilik eshituvida partiya elektorati vakillari mutasaddilarga bevosita murojaat qilish imkoniyatiga ega bo‘ldi, fuqarolarni o‘ylantirayotgan qator masalalar yuzasidan aniq choralar belgilandi.
Xalq demokratik partiyasi deputatlari hududlardagi o‘rganish natijalari asosida fikr-mulohaza va takliflarini bildirishdi. Kambag‘allikni qisqartirish va ijtimoiy himoyaning manzilliligini oshirish muhimligi bildirildi. Ayniqsa, yoshlar va xotin-qizlar bandligini ta’minlash, ularning tashabbuslarini qo‘llab-quvvatlash ustuvor vazifalardan biri ekani qayd etildi.
Xalq demokratik partiyasi so‘l qanot sifatida mazkur yo‘nalishdagi ishlarning ijrosi ustidan deputatlik va jamoatchilik nazoratini kuchaytirish, aholi murojaatlari bilan yaqindan ishlash, ularni yanada samarali hal etish bo‘yicha sa’y-harakatlarini izchil davom ettirishi ta’kidlandi.
O‘zXDP Markaziy Kengashi Axborot xizmati.