Депутатлик сўровлари ҳақида аввал ҳам кўп ёзганмиз. Уларнинг аҳамияти ва амалий натижаларига тез-тез тўхталамиз. Бу сафар эса кўпроқ сўровлар ортидан амалга оширилаётган ишлар ҳақида гапирмоқчимиз. Чунки ҳар бир депутатлик сўрови ортида муайян маҳалла, муайян оила ёки инсон тақдири туради.

Муҳими — сифат!

Халқ депутатлари Олмазор тумани Кенгашидаги ЎзХДП депутати Зиё Паризод Азамат қизи томонидан юборилган депутатлик сўрови ўзининг амалий натижасини берди. Яъни сайлов округидаги Мухбир ва Тараққиёт кўчаларида йўл қопламасининг яроқсиз ҳолга келиши сайловчиларнинг эътирозига сабаб бўлаётган эди.

Депутат ҳудудга чиқиб, амалга оширилаётган ишлар жараёни билан танишди. Ўрганиш давомида йўл қопламасининг ҳолати, қурилиш-таъмирлаш ишларининг сифати ҳамда белгиланган муддатларга риоя этилиши юзасидан масъуллар билан мулоқот қилинди.

– Сайлов округимдаги мазкур муаммо бўйича фуқаролар бир неча бор мурожаат қилишган, – дейди депутат. – Албатта, йўл масаласи бир қарашда оддий хўжалик муаммосидек кўриниши мумкин. Лекин ўша кўчада яшаётган одам учун бу — ҳар куни дуч келадиган қийинчилик.

Айниқса, ёғингарчилик пайтида йўлнинг ҳолати пиёдаларга ҳам, транспорт воситаларига ҳам мушкулот туғдиради. Шунинг учун аҳолининг мурожаатини депутатлик сўрови орқали тегишли масъуллар олдига олиб чиқдик. Бугун эса мазкур кўчаларда асфальтлаш ишлари олиб борилмоқда.

Мен ҳудудга чиқиб, иш жараёни билан танишдим. Бу ерда биз учун фақат асфальт ётқизилиши эмас, унинг сифати ҳам муҳим. Шунинг учун йўл қопламасининг сифати, таъмирлаш ишларининг белгиланган талаблар асосида бажарилиши ва муддатларга риоя этилиши бўйича масъуллар билан назорат ўрнатдик.

Менимча, депутатлик фаолиятининг энг зарур жиҳатларидан бири ҳам шу — одамларнинг мурожаатини эшитишнинг ўзи етарли эмас. Имкониятимиз доирасида унинг ечими учун ҳаракат қилишимиз ва жараённи охиригача кузатиб боришимиз керак.

Бекат хавфсиз ва қулай бўлиши керак

Халқ депутатлари Қашқадарё вилояти Кенгаши депутати С. Камилова томонидан юборилган депутатлик сўровига Қашқадарё вилояти транспорт бошқармаси бошлиғи Б. Язданов томонидан жавоб берилди.

Кимгадир бекатлар шунчаки йўловчилар автобус кутадиган жой бўлиб кўриниши мумкин. Аммо эрталаб ишга ёки ўқишга шошаётган одам, фарзандини шифохонага олиб кетаётган она, ёши катта инсон учун қулай ва хавфсиз бекат — бу оддий иншоот эмас, кундалик ҳаётдаги зарур шароит.

Қарши шаҳридаги автобус бекатлари билан боғлиқ масала ҳам ана шу эҳтиёждан келиб чиқиб депутатлик сўровида кўтарилган эди.

Вилоят транспорт бошқармаси томонидан берилган жавобда бу масала бўйича аниқ ишлар режалаштирилгани маълум қилинган.

Қайд этилишича, Қарши шаҳрида 35 та оралиқ ҳамда 5 та бошланғич ва якуний автобус бекатларини қуриш ва жиҳозлаш учун 1 миллиард сўм маблағ ажратилган. Мазкур маблағ Қарши шаҳар ободонлаштириш бошқармасига йўналтирилган.

Айни пайтда янги бекатларни қуриш бўйича лойиҳа-смета ҳужжатлари ишлаб чиқилиб, экспертиза хулосасини олиш учун тақдим этилган. Хулоса олингач, қурилиш ишлари белгиланган тартибда ташкил этилади.

Яна бир эътиборли жиҳат — янги бекатлар шунчаки исталган жойда эмас, аҳоли учун энг зарур нуқталарда барпо этилади.

2026 йилда қурилиши режалаштирилган бекатлар учун Алишер Навоий, Денов, Ҳасаф ва Мустақиллик кўчаларидаги аҳоли гавжум ҳудудлар, “Она ва бола” маркази, вилоят болалар шифохонаси, деҳқон бозори, Давлат хизматлари маркази ҳамда ОИТС маркази олди танланган.

– Бу рўйхатнинг ўзиёқ масаланинг моҳиятини кўрсатиб турибди. Бекатлар одамлар энг кўп ҳаракатланадиган, тиббий ва ижтимоий хизматларга мурожаат қиладиган нуқталарга яқин бўлади, – дейди депутат.

Албатта, ҳали амалий ишлар олдинда. Лойиҳа, экспертиза ва қурилиш жараёнлари бор. Шунинг учун масалани фақат “маблағ ажратилди” деган жойда тўхтатиб қўйиш эмас, белгиланган ишлар амалда қандай бажарилаётганини кузатиб бориш ҳам муҳим.

— Чунки ҳар қандай депутатлик сўровининг энг катта натижаси қоғоздаги жавоб эмас, одамларнинг ҳаётидаги ўзгаришда аслида…

Сабаблар аниқланса, иш осонлашади

Олдинда совуқ кунлар. Бундай пайтда хонадондаги газ таъминотининг барқарор бўлиши ҳар бир оила учун муҳим. Айниқса, кечаси ҳаво совиб, ёқилғига эҳтиёж янада ортади.

Шундай шароитда газ босимининг пастлиги ёки унинг бир неча соатга узилиб қолиши оддий ноқулайлик эмас. Бу — хонадондаги кундалик ҳаётга бевосита таъсир қиладиган масала.

Тахиатош туманидаги “Шамшироқ” маҳалласи, К. Саипов кўчасида яшовчи аҳоли анча пайтдан бери ана шундай муаммога дуч келаётган эди. Маҳалла фаоллари билан учрашув чоғида кўчада табиий газ босимининг пастлиги, айрим ҳолатларда эса кечки пайтдан тонггача газ таъминотида узилишлар кузатилаётгани маълум бўлди.

Масалани ўрганиш учун халқ депутатлари Тахиатош туман Кенгашидаги ЎзХДП депутатлик гуруҳи раҳбари Даврон Артиков ҳудудга чиқди.

Ўрганиш давомида муаммо фақат газ босими билан боғлиқ эмаслиги аниқланди. Кўчадаги газ қувурларининг айрим қисмлари ер остида қолиб кетган, бошқа жойларда эса тармоқлар аҳоли хонадонлари олдидан тартибсиз ҳолда ўтказилган. Эскирган қувурлар ҳам газ таъминотидаги узилишларга сабаб бўлаётган омиллардан бири эди.

Шундан сўнг депутат масъул ташкилотлар билан боғланиб, газ қувурларини тартибга келтириш, ер остида қолган қисмларини юзага чиқариш ҳамда эскирган қувурларни янгилаш масаласини кўтарди. Энг муҳими, мурожаат фақат ўрганиш ва масъулларга билдириш билан чекланиб қолмади.

Ҳудуддаги эскирган газ қувурлари янгисига алмаштирилди, ер тагида қолиб кетган қувурлар юзага чиқарилди. Натижада газ таъминотидаги мавжуд муаммолар бартараф этилди. Бир қарашда, бу — газ қувурларини алмаштириш билан боғлиқ оддий техник иш. Аммо унинг ортида ҳар куни шу хонадонларда яшаётган одамларнинг хотиржамлиги бор.

“Ёмчи”да янги мактаб қурилади

Бойсун тумани Бошработ маҳалласи фуқаролари депутатимизга “Ёмчи” қишлоғи ҳудудида янги умумий ўрта таълим мактаби қуриш бўйича мурожаат қилишди.

Мазкур масала халқ депутатлари Бойсун туман Кенгаши раиси, депутат Б.Хаитова томонидан депутатлик сўрови орқали тегишли ташкилотлар олдига қўйилди. Хусусан, янги мактаб қурилишини 2027 йилги Давлат инвестиция дастурига киритиш масаласи кўтарилди.

Депутатлик сўровига берилган жавобда эса Бошработ маҳалласи аҳолиси учун муҳим бўлган ушбу таклиф қўллаб-қувватлангани маълум қилинди. Қайд этилишича, “Ёмчи” қишлоғида 360 ўринли янги мактаб биноси қурилиши режалаштирилган.

Аҳоли кўтарган масаланинг давлат даражасидаги инвестиция режасига киритилиши муаммони ҳал этиш йўлидаги муҳим қадам ҳисобланади.

Бу ерда яна бир жиҳат намоён бўлмоқда: фуқаронинг мурожаати эътибордан четда қолмаса, у тегишли тартибда ўрганилиб, депутатлик сўрови орқали масъул ташкилотлар олдига аниқ масала сифатида қўйилса, муаммонинг ечими учун имконият пайдо бўлади.

Лазиза Шерова,
“Ўзбекистон овози” мухбири.