“Biznesni rivojlantirish banki” ATB mamlakatimizda izchil amalga oshirilayotgan “Kichik biznesni uzluksiz qo‘llab-quvvatlash” kompleks dasturining asosiy tayanch banki o‘laroq tadbirkorlikni qo‘llab quvvatlash, yangi ish o‘rinlari va aholi uchun qo‘shimcha daromad manbalarini yaratishga salmoli hissa qo‘shib kelmoqda. Buni o‘tgan – 2025 yilda erishilgan natijalar ham yaqqol ko‘rsatib turibdi.
Ommaviy axborot vositalari uchun kontent tayyorlash markazida o‘tkazilgan anjumanda shu haqida so‘z borar ekan, “Inson qadri uchun” tamoyili bilan uyg‘un loyihalar mazkur bank xizmatlarini zamon talablariga moslashtirish, tadbirkorlikni qo‘llab-quvvatlash va yangi ish o‘rinlari yaratishga xizmat qilayotgani alohida qayd etildi.– 2026 yil 1 yanvar holatiga bankning umumiy kapitali 5,27 trillion so‘mga yetdi, – deydi Biznesni rivojlantirish banki Strategiya bosh direktori Baxtiyor Rahmatov. – Bu o‘tgan yilga nisbatan qariyb 25 foizga yuqorilaganini ko‘rsatadi. Bank aktivlari ham o‘sishda davom etib, 38 trillion 167 milliard 731 million so‘mni tashkil qildi. Bu 2024 yilga nisbatan 18,8 foizga ko‘pdir. Daromad keltiruvchi aktivlar 32 trillion 184 milliard 800 million so‘mga yetdi. O‘tgan yili bank tomonidan jami 10 trillion 380 milliard so‘m kredit mablag‘lari ajratildi. Bu mablag‘lar iqtisodiyotning turli sohalarida yangi loyihalarni amalga oshirishga xizmat qildi.
Ta’kidlanishicha, Biznesni rivojlantirish banki mijozlari soni 1 million 865 ming 608 nafar bo‘lib, shundan 1 million 768 ming 254 nafari jismoniy, 97 ming 354 nafari yuridik shaxslar hisoblanadi.
Ma’lumot o‘rnida aytish joiz, 2026 yil 1 yanvar holatiga bankning xizmat ko‘rsatish ofislari soni 76 tani tashkil etdi. Shuningdek, mijozlar uchun 156 ta xalqaro pul o‘tkazmalari, 198 ta valuta ayirboshlash va 327 ta 24/7 rejimda xizmat ko‘rsatuvchi shoxobchalar yo‘lga qo‘yilgan.
– “Kichik biznesni uzluksiz qo‘llab-quvvatlash” dasturi doirasida 7 601 nafar tadbirkorga 820 milliard so‘m kredit ajratildi, – deydi bankning Strategik rivojlantirish departamenti direktori Ozoda Shukurova. – Buning natijasida 7 ming 800 dan oshiq ish o‘rni yaratildi. Bankka biriktirilgan 610 ta mahallada 2025 yil davomida 5 trillion 215 milliard so‘m kredit ajratildi. Natijada 262 ming 293 nafar aholining bandligi ta’minlandi. Shundan 97 ming 328 nafari doimiy ishga joylashtirildi, 164 ming 965 nafar fuqaro tadbirkorlikka jalb qilindi. “Sayxunobod tajribasi” asosida 6 ming 689 ta moliyaviy paket shakllantirildi. 28 ming 12 ta mikroloyiha amalga oshirilib, 704 milliard so‘m kredit ajratildi.
“Uychi tajribasi” doirasida joylarda 1 ming 368 ta uchrashuv o‘tkazildi. Bu bo‘yicha 5 ming 620 ta murojaat o‘rganilib, amaliy choralar samarasida 8 ming 688 ta ish o‘rni ochildi. “Ayol tadbirkor” kredit mahsuloti doirasida 1 ming 530 nafar opa-singillarimizga 192,4 milliard so‘m kredit berildi.
Aholining turar joyga bo‘lgan talabidan kelib chiqib, 2025 yilda 6 ming 919 nafar fuqaroga 1 trillion 892 milliard so‘mlik ipoteka kreditlari ajratildi. Ularning qariyb yarmiga subsidiyali ipoteka kreditlari taqdim etilgani e’tiborga molikdir.
Tadbirda bankning 2026 yildagi ustuvor vazifalari haqida ham ma’lumot berildi. Unda tadbirkorlikni qo‘llab-quvvatlashni kengaytirish, yangi ish o‘rinlari yaratish, innovatsion xizmatlarni joriy etish va jamoatchilik bilan ochiq muloqotni kuchaytirishga alohida diqqat qaratilishi aytib o‘tildi.
Bundan tashqari, jamoatchilik bilan ochiq muloqotni mustahkamlash, faoliyat shaffofligi va hisobdorligini ta’minlash bank faoliyatining doimiy ustuvor yo‘nalishlaridan biri bo‘lib qolishi ta’kidlandi.
O‘z navbatida, innovatsion moliyaviy yechimlar va yangi xizmat turlarini joriy etish orqali mijozlarga yanada keng imkoniyatlar yaratish ko‘zda tutilgan.
Tadbir yakunida ommaviy axborot vositalari vakillari o‘zlarini qiziqtirgan savollarga javob oldi.
Toshtemir XUDOYQULOV,
“O‘zbekiston ovozi” muxbiri.