Mikrokreditbank respublikamizda kichik biznes, xususiy va yakka tartibdagi tadbirkorlikni rivojlantirish, hunarmandchilik hamda kasanachilikni qo‘llab-quvvatlash yo‘li bilan yangi ish o‘rinlarini yaratish, ayniqsa, qishloq joylarda mikromoliyaviy xizmatlarni kengaytirish borasida sezilarli yutuqlarga erishmoqda. Xususan, o‘tgan yili bankning 92 ta hududiy bo‘linmasiga biriktirilgan 1 ming 62 ta mahallada 320 nafar mahalla bankiri, ularga yordamchi agentlar faoliyati yo‘lga qo‘yildi.
Bu haqida Milliy matbuot markazida “Mikrokreditbank” ATB tomonidan aholi bandligini oshirish, kambag‘allikni qisqartirish bo‘yicha 2025 yilda amalga oshirilgan ishlar sarhisobiga bag‘ishlab o‘tkazilgan matbuot anjumanida so‘z yuritildi.
Qayd etilishicha, 2025 yilda bank tomonidan 10,2 trillion so‘m kreditlar ajratilgan, shuningdek, kichik va o‘rta biznesga 7,9 trillion so‘m, turli dasturlar doirasida 4,2 trillion so‘m kredit taqdim qilingan hamda 345 ming 895 nafar aholi bandligi ta’minlangan. Ularning 122 ming 66 nafari doimiy ishga joylashtirilgan bo‘lsa, qariyb 224 ming nafari tadbirkorlikka jalb qilingan.
Bundan tashqari, 47 ming 975 ta mikroloyihaga 905,1 milliard so‘m kredit ajratilib, 98 ming 305 ta ish o‘rni yaratildi. Kam daromadli 11 ming 142 ta xonadon 318 milliard so‘mlik loyiha paketlari bilan qo‘llab-quvvatlandi, bu esa 16 ming 700 dan ziyod ishsiz fuqarolar uchun muqim daromad manbai yaratilishiga olib keldi.
“Bir kontur – bir mahsulot” tamoyili doirasida 5 ming 210 nafar aholi 34 ming 764 tonna qishloq xo‘jaligi mahsulotlari yetishtirdi. Ahamiyatlisi, bu mahsulotlarning muayyan qismi eksportga chiqarildi.
“Kambag‘allikdan farovonlik sari” dasturi doirasida 181 ta hududiy bo‘linma rahbarlari va yordamchi agentlar 412 ta oilaning turmush sharoitini yaxshilash orqali ularni Ijtimoiy reyestrdan chiqarishga muvaffaq bo‘ldi.
2026 yil ham «Mikrokreditbank» uchun qizg‘in va samarali keldi. Misol uchun, birinchi chorakning o‘zida 1,7 trillion so‘m kredit ajratilib, aholi bandligi borasida muhim qadamlar qo‘yilmoqda.
Yoshlar uchun “Bir kontur – bir mahsulot” tamoyili asosida 362 ta namunali loyiha amalga oshirilishi uchun agregatorlarga 5,85 milliard so‘m kredit ajratilgan. Masalan, Toshkent viloyati Parkent tumani “Shampan” mahallasida 10 nafar yigit-qizga 1 gektardan yer ijaraga berilgan bo‘lib, ushbu ekin maydonlarida pomidor yetishtirish ko‘zda tutilmoqda. Bu bo‘yicha “Transport Globus» korxonasi va yer egalari o‘rtasida fyuchers shartnomasi imzolanib, dastlabki hisob-kitoblarga ko‘ra, birinchi ekinda 350 tonna mahsulot yetishtiriladi va har bir yosh 60 million so‘m daromad olishi rejalashtirilgan.
Bir so‘z bilan aytganda, «Mikrokreditbank» bu singari muhim loyihalar orqali kambag‘allikni kamaytirish va mahalliy mahsulotlarning eksport salohiyatini oshirishni, ayniqsa, qishloq hududlarda iqtisodiy faollikni yanada rivojlantirishni maqsad qilgan.
Toshtemir XUDOYQULOV,
“O‘zbekiston ovozi” muxbiri.