Kecha parlament quyi palatasining navbatdagi yig‘ilishi ham qizg‘in bahslar asosida o‘tdi. Zalda o‘tirgan deputatlarning har biri muhokama qilinayotgan masalalar bo‘yicha o‘z fikri, qarashi va tahliliy yondashuviga ega. Ammo biror qonun loyihasining qabul qilinishi uchun barcha deputatlarning turli fikrlari ma’lum bir uyg‘unlikka kelishi talab etiladi.
Bu oson jarayon emas. Chunki muhokamalarda fikrlar xilma-xil bo‘ladi va har biri asosli ravishda ilgari suriladi. Qonunchilik palatasining birgina majlisini kuzatgan inson ham shuni anglaydiki, har bir qonun loyihasi, huquqiy hujjat chuqur va har tomonlama muhokamadan o‘tadi.
Eng muhimi, bu muhtasham va o‘ta mas’uliyatli zalda «dunyoga kelayotgan» har bir qonun, qabul qilinayotgan har bir qaror odamlarimizning hayotini yengillashtirishga qaratilgani bilan ahamiyatlidir.
Yig‘ilish kun tartibiga ko‘ra, dastlab “O‘zbekiston Respublikasining ayrim qonun hujjatlariga qo‘shimcha va o‘zgartirishlar kiritish to‘g‘risida”gi qonun loyihasi ikkinchi o‘qishda ko‘rib chiqildi.
Ushbu qonun loyihasi bilan “El-yurt umidi” jamg‘armasi stipendiatining majburiyatlarini aniq belgilash, jamg‘arma tomonidan sarflangan mablag‘larni undirish yuzasidan fuqarolik ishlari bo‘yicha sudlarga da’vo kiritishda davlat bojini to‘lashdan ozod qilishni nazarda tutuvchi normani kiritish taklif etilmoqda.
Shuningdek, loyihada idoraviy normativ-huquqiy hujjatlar loyihalarini ishlab chiqish va kelishish tartibini soddalashtirish hamda muddatlarni qisqartirish nazarda tutilmoqda.
Xususan, bunday hujjatlar loyihasining jamoatchilik muhokamasi muddatini 10 kun etib belgilash, 5 kun ichida taklif kelib tushmagan taqdirda loyihani huquqiy ekspertizaga kiritish imkoniyatini berish, shuningdek, Adliya vazirligi tomonidan huquqiy ekspertiza va davlat ro‘yxatidan o‘tkazish muddatini 20 kunga qisqartirish taklif etilmoqda.
Qizg‘in o‘tgan majlisda qonun loyihasi deputatlar tomonidan ikkinchi o‘qishda qabul qilindi.
“Reklama to‘g‘risida”gi qonunning ayrim moddalariga qo‘shimcha va o‘zgartirishlar kiritilmoqda
Majlisda sug‘urta xizmatlariga oid reklamalarni takomillashtirishga qaratilgan qonun loyihasi birinchi o‘qishda ko‘rib chiqildi.
Ushbu qonun loyihasi bilan “Reklama to‘g‘risida”gi qonunning ayrim moddalariga qo‘shimcha va o‘zgartirishlar kiritish nazarda tutilmoqda. Unga ko‘ra, sug‘urta savodxonligini oshirishga qaratilgan axborotni ijtimoiy axborot etib belgilash hamda ijtimoiy axborotning reklama beruvchilari sifatida sohalardagi vakolatli davlat organlarini ham kiritish taklif etilmoqda.
Qonun loyihasi sug‘urta bozori professional ishtirokchilari tomonidan ko‘rsatiladigan xizmatlar to‘g‘risida iste’molchilarni keng qamrovli va ishonchli axborot bilan ta’minlash orqali ularning bu xizmatlardan foydalanishi uchun qulay shart-sharoitlar yaratish, aholida sug‘urta xizmatlariga bo‘lgan ishonchni oshirishni nazarda tutadi.
Muhokamalar davomida deputatlar qonun loyihasining ahamiyati haqida o‘z fikr mulohazalarini bildirib, undagi ayrim normalar bo‘yicha qonun tashabbuskorlariga aniqlashtiruvchi savollar berdi. Mutasaddilar barcha savollarga tushuntirishlar berib o‘tdi.
Muhokamalardan so‘ng, qonun loyihasi deputatlar tomonidan birinchi o‘qishda qabul qilindi.
Eksport tartib taomillari jahon savdo tashkiloti qoidalariga muvofiqlashtiriladi
Majlisda “Litsenziyalash, ruxsat berish va xabardor qilish tartib-taomillari to‘g‘risida”gi O‘zbekiston Respublikasi qonuniga eksport tartib-taomillarini Jahon savdo tashkiloti qoidalariga muvofiqlashtirishga qaratilgan o‘zgartirishlar kiritish haqida”gi qonun loyihasi birinchi o‘qishda ko‘rib chiqildi.
Ushbu qonun loyihasi bilan “Litsenziyalash, ruxsat berish va xabardor qilish tartib taomillari to‘g‘risida”gi qonunga O‘zbekiston Respublikasi Prezidenti va Hukumati qarorlariga binoan olib chiqiladigan buyumlar va mahsulotlarni eksport qilishga doir ruxsatnoma berish tartibini bekor qilishni nazarda tutuvchi o‘zgartirishlar kiritilmoqda.
Shuningdek, loyiha bilan litsenziyalash va ruxsat berish sohasidagi huquqbuzarliklar uchun yuridik shaxslarga qo‘llaniladigan jarimalar ro‘yxatidan eksportga oid cheklovlar chiqarib tashlanmoqda.
Deputatlarning ta’kidlashicha, belgilanayotgan normalar mahsulotlar eksportini kengaytirish, eksportdagi mavjud cheklovlarni bartaraf etish, raqobat va ochiq bozor muhitini yaratishga, shuningdek, milliy qonunchiligimizni JST qoidalariga uyg‘unlashtirishga xizmat qiladi.
Qizg‘in o‘tgan majlisda qonun loyihasi deputatlar tomonidan ikkinchi o‘qishda qabul qilindi.
Transport vaziri parlamentga axborot beradi
Deputatlar transport vaziri I.Mahkamovning “Temir yo‘l transporti sohasida davlat siyosatini amalga oshirish, temir yo‘l infratuzilmasini rivojlantirish hamda yo‘lovchi va yuk tashish xizmatlarini takomillashtirish borasida amalga oshirilayotgan ishlar to‘g‘risida”gi axborotini eshitish haqidagi masalani ko‘rib chiqdilar.
Ta’kidlanganidek, mamlakatimizda temir yo‘l transporti sohasini jadal rivojlantirish, zamonaviy infratuzilmani shakllantirish, logistika tizimini takomillashtirish, yuk va yo‘lovchi tashish xizmatlari samaradorligini oshirish, shuningdek, aholi va iqtisodiyot tarmoqlarini ishonchli, uzluksiz va sifatli transport xizmatlari bilan ta’minlash borasida keng ko‘lamli ishlar amalga oshirilmoqda.
Shu bilan birga, Qonunchilik palatasi deputatlarining joylarga chiqib o‘rganishlari jarayonida temir yo‘l transportida yo‘lovchi va yuk tashish xizmatlari darajasini oshirish, vagonlar sonini ko‘paytirish va sifatini yaxshilash, vokzallar infratuzilmasini rivojlantirish, servis va raqamli xizmatlar bilan bog‘liq ayrim masalalar kuzatilmoqda. Majlisda shundan kelib chiqib, mazkur masala yuzasidan transport vazirining axborotini eshitish haqida tegishli qaror qabul qilindi.
Laziza Sherova,
“O‘zbekiston ovozi” muxbiri.