Muallif: root_super

Ijtimoiy tarmoq sahifalarida Chilonzor tumanidagi 188-maktabda o‘qituvchi o‘quvchini kaltaklaganligi haqida xabar chop etildi.

Mazkur holat yuzasidan Toshkent shahar maktabgacha va maktab ta’limi boshqarmasi quyidagilarni ma’lum qiladi. Chilonzor tumanidagi 188-sonli umumta’lim maktabida 2024 yil 23-sentabr kuni taxminan soat 15 lar atrofida ikkinchi smenada 6-«V» sinfida rus tili fani darsi mahalida o‘qituvchi R.O. ga o‘quvchi E.G. gap qaytargan va tortishib qolgan. So‘ngra o‘qituvchi R.O. o‘quvchi E.G. ni qulog‘idan cho‘zgan, o‘tirgan joyidan partasidan tortib olib chiqqan va o‘quvchining yuziga tarsaki tushirgan. O‘quvchiga tan jarohati yetkazilmagan, salomatligi joyida.

Bundan xabar topgan o‘quvchi E.G. ning ota-onasi o‘qituvchining bu xatti-harakati yuzasidan huquq-tartibot idoralariga murojaat qilishgan. Ayni paytda surishtiruv ishlari olib borilmoqda.

Ma’lumot o‘rnida shuni ma’lum qilamizki, rus tili fani o‘qituvchisi R.O. sinov muddati bilan maktabga ishga taklif qilingan, rasman u 188-maktabga ishga qabul qilinganligi bo‘yicha hali buyrug‘i chiqmagan va yuqoridagi voqea uning dastlabki ish kunida sodir bo‘lgan.

Xabaringiz bor, kuni kecha Prezident Shavkat Mirziyoyev raisligida qurilish industriyasi va qurilish materiallari tarmog‘ini rivojlantirish chora-tadbirlari muhokamasi bo‘yicha videoselektor yig‘ilishi o‘tkazildi. Unda iqtisodiyotimizning eng muhim tarmoqlaridan biriga aylangan mazkur sohada erishilayotgan yutuqlar bilan bir qatorda mavjud muammolar, xususan, aholi manfaatlariga zid o‘laroq davom etayotgan holatlar tanqid qilindi. Joylardagi qurilishlar sifati masalasiga alohida e’tibor qaratildi. Ayrim pala-partish loyihalar odamlarning e’tiroziga sabab bo‘layotgani qayd etildi.

Aytib o‘tilganidek, bugungi uy-joylar qurilishida aldov, tushunmovchiliklar uchrab turibdi. Shu bois endi uy-joy sotib olish bo‘yicha kafolatli “eskrou” tizimi joriy qilinishi belgilandi.

Dunyo tajribasidan o‘tgan eskrou tizimi – bu ma’lum shartlar bajarilgunga qadar pul saqlanadigan bankdagi maxsus hisobvaraq bo‘lib, qurilayotgan uyga buyurtma beruvchi o‘z pulini eskrou hisobraqamiga qo‘yadi va sotuvchi (qurilish korxonasi) faqat shartnomadagi majburiyatlarini bajarganidan so‘ng uni olishi mumkin. Ko‘rinib turibdiki, uy-joy qurishni eskrou hisobraqami asosida moliyalashtirish aholi manfaatini kafolatlaydi.

“Bunda banklar quruvchi va xaridor o‘rtasida ko‘prik bo‘lib, uy-joyning o‘z vaqtida va sifatli qurilib, egasiga topshirilishiga kafil bo‘ladi”, dedi davlat rahbari.

Eslatib o‘tamiz, O‘zbekiston Xalq demokratik partiyasi turar-joylarni qurishda jalb qilingan aholi mablag‘larini himoya qilish kafolatlarini yaratish masalasini o‘z Saylovoldi dasturiga kiritgan. Ushbu maqsadda “Ulush kiritish asosida uy-joy qurishda ishtirok etish to‘g‘risida”gi Qonunni qabul qilish tashabbusini ilgari surmoqda. Bunda uy xaridorlari pulini maxsus eskrou hisobraqamga joylashtirish va qurilish korxonasining shartnomadagi majburiyatlarini bajarishiga qarab, bosqima-bosqich mablag‘larni olishi tartibini joriy etish qonuniy asosda mustahkamlanadi.

Samarqand shahrida Tracker-2 haydovchisi velosiped boshqarib ketayotgan 12 yoshli bolani urib yubordi. Bu haqida viloyat YHXB xabar berdi.

Ma’lum qilinishicha, holat 23-sentabr kuni soat 19:10 larda Samarqand shahar Afrosiyob ko‘chasida sodir bo‘lgan. Tracker-2 haydovchisi piyodalar o‘tish joyidan o‘tayotgan, voyaga yetmagan, 2012-yilda tug‘ilgan velosipedchini urib yuborib, YTH keltirib chiqargan.

Oqibatda velosipedchi tan jarohati olib, Samarqand shahar tibbiyot birlashmasiga yotqizilgan. Holat yuzasidan Samarqand shahri bo‘yicha YHXB tomonidan dastlabki surishtiruv ishlari olib borilmoqda.

Prezident Shavkat Mirziyoyev raisligida qurilish industriyasi va qurilish materiallari ishlab chiqarishni rivojlantirish masalalariga bag‘ishlangan videoselektor yig‘ilishi davom etmoqda.

Yig’ilishda qurilish materiallari ishlab chiqarish ikki yilda 1,2 karra oshgan bo‘lsa-da, ko‘rilgan choralar hisobiga energiya sarfi 1,3 barobar, energiya sig‘imi 1,6 barobar kamaygani ma’lum qilindi. Bugungi kunda ilg‘or xorijiy korxonalar ishlatib bo‘lingan issiqlik energiyasidan qayta foydalanish orqali elektr ishlab chiqarish texnologiyasini faol qo‘llamoqda.

Misol uchun, Navoiydagi “Qizilqumsement” pechlarni, issiqlik almashish uskunalarini rekonstruksiya qilib, yiliga 37 million kilovatt soat elektr iqtisod qildi.

Mutasaddilarga energiya sarfi yuqori bo‘lgan 34 ta korxonada 1 noyabrgacha energoauditni yakunlab, yiliga 300 million kilovatt soat elektr energiyasi iqtisod qilishni ta’minlash topshirildi.

Ayni daqiqalarda Prezident Shavkat Mirziyoyev raisligida qurilish industriyasi va qurilish materiallari ishlab chiqarishni rivojlantirish masalalariga bag‘ishlangan videoselektor yig‘ilishi bo’lib o’tmoqda.

Yig’ilishda davlatimiz rahbari mamlakatimiz oldida tashqi mehnat migratsiyasi sohasida ochilayotgan ulkan imkoniyatlarni to‘liq ishga solish zarurligini ta’kidladi. Shu munosabat bilan Tashqi mehnat migratsiyasi agentligi Hukumat bo‘ysunuviga o‘tkazildi va Bexzod Musayev unga rahbar etib tayinlandi.

Agentlikka fuqarolarimizning xorijdagi yuqori daromadli mehnat bozorlariga kirishi bo‘yicha boshlangan ishlarni jadallashtirish topshirildi. Hokimlar va xorijdagi diplomatik vakolatxonalar xorijda mehnat qilayotgan yurtdoshlarimiz taqdiri uchun agentlik bilan tengma-teng javobgar bo‘lishi belgilandi.

«O‘zgidromet» xabariga ko‘ra, ushbu haftaning birinchi yarmida O‘zbekiston hududining katta qismida quruq va iliq ob-havo saqlanib turadi. Faqat 24-25 sentabr kunlari Qoraqalpog‘iston Respublikasida va 25 sentabrda Xorazm viloyatida ba’zi joylarda asosan jadalligi biroz bo‘lgan yomg‘ir yog‘adi.

Haftaning ikkinchi yarmida respublika hududiga Kaspiy dengizi hududlaridan biroz salqin va nisbatan nam havo kirib kelishi kutilmoqda.

26-27 sentabr kunlari Farg‘ona vodiysi viloyatlari bo‘yicha ba’zi joylarda yomg‘ir yog‘adi. Toshkent, Samarqand, Jizzax, Sirdaryo viloyatlarining ayrim joylarida 26-sentabrda biroz qisqa muddatli yomg‘ir yog‘ishi mumkin.

Sharqiy shamol yo‘nalishini o‘zgartirib, g‘arbdan 7-12 m/s tezlikda esadi, 24-25 sentabrda shimolda va cho‘l hududlarda, 26-sentabrda respublika bo‘yicha ba’zi joylarda 13-18 m/s gacha kuchayishi, ayrim joylarda chang-to‘zonlar bilan kuzatilishi mumkin.

Poytaxtda: asosan yog‘ingarchiliksiz ob-havo kuzatiladi, faqat 26-sentabrda biroz qisqa muddatli yomg‘ir yog‘ishi mumkin. Harorat asosan kechalari 14-17 daraja, kunduz kunlari 23-25 sentyabrda 28-31 daraja, 26-27 sentabrda 24-27 daraja bo‘ladi.